 واحد من الناس
السلام عليكم ورحمة الله وبركاته
كيفكم حبايب قلبي
أكيد مستغربين من أسم الموضوع انا صراحه قريت موضوع اخونا زاكا وتأثرت صراحه وحاب اني اتكلم عن معاناتي زي ما تكلم ...... نبدأ
شوفوا يا حلوين انا اتخرجت من ثالث ثنوي علمي بنسبة 94 % كنت دافور وحق مذاكره وشي طبعا دراستي كانت كلها في الباحة بعيد عن اهلي وبعدها جيت جدة عند أبويه واخواتي عشان ادرس طب وفعلا قدمت بس للأسف رفضوني لأنو زي ما انتم عارفين الواسطات لها دور وانا العبد الفقير مالي غير الله المهم قبلوني في الهندسه الطبيه وقالولي لو جبت معدل نهاية السنه ممكن تنقل طب وفعلا شديت حيلي وكرفت وربي لو تشوفوا الكتب وربي تخوف خاصه الفيزياء والكيمياء وكل امها بالإنجليزي ^_^ المهم الحمد لله جبت معدل 4 ونص من 5 وفرحة فرحه جبااااااااااااااااره وفعلا نقلت طب وكانت فرحتي عارمه <<<< كيف عارمه جيده ^_^
المهم بدأت بدراسة الطب وخلصت أول سنه وجبت معدل ^_^ جيت ثاني سنه على نهايتها الوالد الله يرحمه جاله سرطان في الفم وطبعا انا الولد الوحيد خلفته الله يرحمه كلها بنات ما عدا أنا اضريت اني احذف ترم عشان اكون مع الوالد وما بقينا مكان إلا ورحنا لين ما ربي كتب واتعافى الوالد ويشهد عليا الله اني فرحت ورجعت الجامعه عشان اقدر استعد للترم الجديد وسبحان الله مر تقريبا شهرين من يوم ما تشافى الولد والله أخذ أمانته وتوفى رحمة الله عليه أنا هنا زي اللي لطشني كف عندي 5 أخوات المهم جدي الله ينتقم منه اخذ كل شي وسابنا في الشارع وربي ماتركلنا ريال صرت زي المجنون ادور على اي وظيفه واشتغلت في مصنع حديد في المستودع احمل حديد واعد حديد وكرف كنت اشتغل من 8 الصباح لين 6 المغرب بدون ما اوقف والخميس نص دوام يعني لين 2 الظهر والجمعه إجازه كنت زي القتيل لما يجي يوم الجمعه قعدت على هذا الحال 6 شهور لين ما سمعت انه في تقديم في البنك الأهلي في قسم الهاتف المصرفي روحت اقدم والحمد لله قبلوني بس قالوا انو تكون على شركه والراتب 3000 ريال والعمل 9 ساعات وشفتات كل اسبوعين شفت واوف واحد في الأسبوع يعني يوم راحه واحد في الاسبوع طبعا وافقت في المصنع كنت آخذ نص الراتب هذا المهم مرة الأيام اللي الله لا يوريكم كأني صبي وربي عند المدرا هذا يقولي سيب خطك وتعال نزل الكراتين في سيارتي المدير يدق على الفراش لو مارد يزهمني اجيبله عصير إنذليت بكل ما تحمله الكلمه من معنى المهم مرت الايام وقعدت على هذا الحال ثلاث سنين خلالها رب يسر لثنتين من أخواتي أولاد الحلال وزجتهم وقلت المسؤليه عليه وبعدها سبحان الله جاء الفرج من عند الله وجا خبر نقلي لفرع التحليه قسم الخدمات الخاصه اللي انا فيه اللحين والحمد لله فين كنت وفين صرت الحمد لله يارب
أنا كتبت هذا الموضوع عشان لا أحد ييأس من رحمة الله إتذكروا دايما قوله تعالى (( ولأن شكرتم لأزيدنكم )) صدق الله العظيم
وما تضيق إلا وتفرج وأنو البلاء إمتحان من عند الله
وشكرا وسامحوني لو طولت عليكم
| 
02-13-2008, 04:54 AM
]
العرض العادي
